រដ្ឋបាលស្រុកឈូក និងរដ្ឋបាលឃុំត្រពាំងភ្លាំង ថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិត ម៉ៅ ធនិន ដែលបានជួយកសាងស្ពានថ្មីជូនប្រជាពលរដ្ឋ

(ខេត្តកំពត)៖ តំណាងឱ្យរដ្ឋបាលស្រុកឈូក រដ្ឋបាលឃុំត្រពាំងភ្លាំង និងបងប្អូនប្រជាពលរដ្ឋទូទាំងមូលដ្ឋាន សូមសម្ដែងនូវសេចក្ដីត្រេកអរ និងការដឹងគុណយ៉ាងជ្រាលជ្រៅបំផុត ចំពោះទឹកចិត្តសប្បុរសធម៌ និងការគិតគូរខ្ពស់ពីសុខទុក្ខរបស់ប្រជាពលរដ្ឋ ពីសំណាក់ ឯកឧត្តមបណ្ឌិត ម៉ៅ ធនិន អភិបាលនៃគណៈអភិបាលខេត្តកំពត និង លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត។

សមិទ្ធផលថ្មី ដើម្បីសម្រួលការធ្វើដំណើរ

ដោយពិនិត្យឃើញពីការលំបាក និងហានិភ័យរបស់បងប្អូនប្រជាពលរដ្ឋ ក្នុងការធ្វើដំណើរឆ្លងកាត់ស្ពានចាស់ដែលមានសភាពទ្រុឌទ្រោមខ្លាំង មិនអាចចរាចរណ៍បាន ឯកឧត្តមបណ្ឌិតអភិបាលខេត្ត បានសម្រេចជួយឧបត្ថម្ភកសាងស្ពានថ្មថ្មីសន្លាងមួយកន្លែង ដែលមានទីតាំងស្ថិតនៅ៖

ទីតាំង៖ ចំណុចខាងកើតវត្តភ្នំចំបក់ ភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។

ស្ពានថ្មីនេះ មិនត្រឹមតែជួយសម្រួលដល់ការរស់នៅរបស់ប្រជាពលរដ្ឋក្នុងឃុំត្រពាំងភ្លាំងប៉ុណ្ណោះទេ ប៉ុន្តែថែមទាំងជាសរសៃឈាមសេដ្ឋកិច្ចយ៉ាងសំខាន់ សម្រាប់បងប្អូនដែលធ្វើដំណើរឆ្លងកាត់តំបន់នោះ ក្នុងការដឹកជញ្ជូនកសិផល និងការធ្វើដំណើរទៅមកប្រចាំថ្ងៃប្រកបដោយសុវត្ថិភាព។

សេចក្ដីថ្លែងអំណរគុណ និងពរជ័យ

ក្នុងឱកាសដ៏វិសេសវិសាលនេះ ថ្នាក់ដឹកនាំរដ្ឋបាលស្រុក និងប្រជាពលរដ្ឋទាំងអស់ សូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមជួយបីបាច់ថែរក្សា និងប្រសិទ្ធពរជ័យសិរីមង្គល វិបុលសុខមហាប្រសើរ ជូនចំពោះ៖

ឯកឧត្តមបណ្ឌិត ម៉ៅ ធនិន និងលោកជំទាវ ព្រមទាំងបុត្រា បុត្រី និងក្រុមការងារទាំងអស់

សូមឱ្យឯកឧត្តម និងលោកជំទាវ មានសុខភាពល្អបរិបូរណ៍ អាយុយឺនយូរ និងទទួលបានជ័យជំនះគ្រប់ភារកិច្ច ដើម្បីបន្តដឹកនាំអភិវឌ្ឍខេត្តកំពត ឱ្យកាន់តែរីកចម្រើនរុងរឿងជានិរន្តរ៍។